Поради штрајкот на вработените во стручните и општите служби на Македонската академија на науките и уметности (МАНУ), зградата на највисоката научна институција во земјава може да остане без доток на електрична енергија, водовод, парно греење итн.

Претседателот на синдикатот на МАНУ, Блажо Вујовиќ, за Слободен печат објасни дека за месец септември нема да бидат исплатени ниту платите на вработените, научните соработници, како наградите на академиците.

– На почетокот штрајкот го организиравме во библиотеката на МАНУ, но таму никој не нè гледаше, па се преселивме во бифето, каде постојано доаѓаат гости, академици и научни соработници, па на тој начин дознаа дека ние имаме некаков проблем. Подолу од ова не може да се отиде и веќе не е битно дали сме со плата или не сме со плата, ние и со плата не сме со плата. Која плата? Минималец? – прашува Вујовиќ.

Вработените во МАНУ не се опфатени со Законот за јавна администрација и нивната плата не се покачува како и на вработените во јавните институции. МАНУ е формирана со посебен закон и единствен надлежен за какви било промени во личните доходи е Собранието на Република Македонија.

– МАНУ е формирана како институција од посебен интерес за државата. Тоа има посебно значење и затоа ние имаме посебен закон, екс-специјалис, во којшто се вметнати платите, со бодови донесени во време кога очигледно никој не мислел дека ќе дојде време да со покачат платите – додава синдикалниот лидер.

Вујовиќ смета дека вработените во МАНУ се долги години врзани со институцијата и дека имаат голем почит кон неа.

– Проблемот е за 34 вработени во секретаријатот и стручните единици и 30 научни соработници. Научните соработници имаа иницијатива за штрајк, исто и тие се назадоволни, меѓутоа тие не се дел од нашиот штрајк, а како дел од нив ги премислија да не штрајкуваат – додава тој.

Вујовиќ тврди дека вработените не штрајкуваат само за плати, туку и за подобри работни услови. Како пример го наведе поплавувањето на архивот на МАНУ, каде што се чуваат најголемите драгоцености на македонската историја и култура.

– Поплавата во архивот беше пред една година, попуштија цевките од парно. Долго време претходно ние им се обраќавме на сите претходни раководства дека ситуацијата со струја, вода, ладење и греење е во многу тешка состојба. Ние и тогаш бевме во штрајк, колегата раководител на архивот дотрча утрото барајќи помош и ние сите отидовме да помогнеме за да ги спасиме артефактите. Морам да додадам дека само дел од академиците дојдоа да помогнат. Инаку таму се чуваат картичките со крвта на Кочо Рацин, личните архиви на Славко Јаневски, Блаже Конески, Лазар Колишевски и на многу други историски личности – вели Вујовиќ.

Целото интервју со нашиот гостин проследете го на следниот линк: