Бутната коска се смета за најтврда коска во човечкото тело, а 35-годишен жител на провинцијата Фуџијан, Кина успеал да ја скрши – со кашлање.

Овој необичен случај неодамна ги збунил кинеските лекари, бидејќи фрактурите на бутната коска најчесто настануваат како последица на сериозна траума, како што се падови од височина или сообраќајни несреќи. Неименуваниот маж им се пожалил на ортопедите дека почувствувал „остра болка во ногата“ откако силно кашлал, но мислел дека се работи за грч, пренесува „Одитицентрал“.

Сепак, тој не можел да се потпре на ногата, па решил да ја посети болницата. Рентгенот покажал скршеница на бутната коска, но неговата приказна немала смисла за лекарите.

Тие одлучиле да го истражат случајот и да го испрашаат пациентот за неговото општо здравје, навиките, исхраната и начинот на живот. Дополнително, направиле и анализа на коскената густина која даде загрижувачки резултати. Испаднало дека е слична на коскената густина на 80-годишен маж.

Тестовите покажале дека тој не боледувал од други болести, па заклучено е дека скршеницата е последица на кревки коски, лоша исхрана и недостаток на физичка активност.

Човекот им признал на лекарите дека водата ја заменил со слатки, газирани пијалаци, кои веројатно го спречиле неговото тело правилно да го апсорбира калциумот.