Посетителите на операта се предупредени дека ќе им биде забранет влез во престижниот театар Ла Скала во Милано доколку се појават во шорцеви, маички без ракави или апостолки. Кимоната, сепак, се прифатливи.

Менаџерскиот тим ги потсети луѓето како да не се облекуваат за опера по поплаките дека некои гледачи носат облека посоодветна за на плажа, пренесува „Гардијан“.

На влезот на Ла Скала е поставен знак со „правила на однесување“, со кој се повикува публиката да „избере облека во согласност со пристојноста на театарот“, додавајќи дека „гледачите кои носат маички без ракакви, шорцеви и апостолки не се дозволени“. Оние кои ќе пристигнат несоодветно облечени нема да добијат поврат на парите. Пораката е исто така ставена на билетите и на веб-страницата на оперската куќа.

Кодексот за облекување против ваква облека беше воведен во 2015 година, годината кога Милано беше домаќин на Светскиот саем, а Ла Скала остана отворена целото лето, како начин да се спречат луѓето да се појавуваат во костими за капење.

Но, досега никогаш не се спроведуваше строго, делумно поради повиците за поголема толеранција во врска со облекувањето од страна на поранешниот француски режисер на Ла Скала, Доминик Мејер, кој во младоста беше критикуван од колегите гледачи во продукциите на Париската опера поради неговиот „работнички изглед“. Мејер подоцна стана генерален директор на оперската компанија.

Со овој поотворен пристап се привлече помлада публика, но се покажа дека постарата публика, честопати од странство, е таа што се облекува несоодветно.

„Правилата сега треба да се зајакнат, особено поради жештината што ја доживуваме. Некои гледачи се вознемируваа откако видоа дека други не се облекуваат соодветно, на пример во апостолки, особено во театар каде што луѓето седат рамо до рамо“, рекол портпаролот на Ла Скала.

Забраната за маички без ракави не им забранува на жените да носат блузи или фустани без ракави, а, според весникот „Кориере дела Сера“, забраната за апостолки не ги спречува „јапонските гледачи со кимона и традиционални обувки“ да влезат.

Потсетникот за кодекс на облекување е дел од поширока ревизија на правилата за бонтон во Ла Скала. На гледачите им е забрането да носат сопствена храна и пијалоци и да фотографираат и снимаат за време на претставите. Покрај тоа, посетителите на операта не смеат да ги ставаат своите мобилни телефони на балустрадата на балконите.