Белгијците се пишманат за прекинот на првенството по заканите од УЕФА
Претставници на Жупилер лигата на денешната средба го известиле претседателот на РБФА дека тие само дале препорака лигата да се прекине и Бриж да биде прогласен за шампион, а не донеле таква одлука.
Откако вчера УЕФА и нејзиниот претседател Александер Чеферин им се заканија на белгиските клубови дека нема да играат во европските купови бидејќи предвреме го завршија првенството и го прогласија Бриж за шампион, денеска доаѓаат поинакви вести од Белгија.
Препорачано
Претседателот на Белгиската фудбалска федерација, Мехди Бајат имал итен состанок со претставиници на Жупилер лигата за да се најде начин да се избегнат санкциите од УЕФА.
Претставниците на Жупилер лигата му најавиле на Бајат дека ќе ја преиспитаат одлуката Бриж да биде прогласен за шампион.
– Бриж сè уште официјално не е шампион. Претставниците на Жупилер лигата не известија дека тие само дале препорака за да се прекине првенството и да се прогласи Бриж за шампион иако не се одиграни сите натпревари до крај. Нивното ветување е дека конечната одлука ќе биде донесена на 15 април на состанокот на лигата со екипите и се надевам дека ќе одлучат да го доиграат првенството за да ги избегнат санкциите од УЕФА – изјавија од фудбалската федерација на Белгија.
