„„Макпетрол” беше известен за преговорите на државата со „Булгартрансгас“. Ме зачудува фактот што вчера одржале состаноци со надлежните институции и ги разговарале сите услови кои се предвидени за договорот меѓу „ГА-МА” АД и „Булгартрансгас”, немале никакви забелешки, односно тие што ги имале, ги посочиле, а денеска наеднаш излегуваат со соопштение дека нема да увезуваат, вели министерот за економија Крешник Бектеши, откако „Макпетрол“ соопшти дека од Нова година повеќе нема да увезува и да испорачува гас под новите услови наметнати од потпишаниот договор за интерконекција меѓу Македонија и Бугарија.

Бектеши во гостување во вестите на ТВ „Сител“ оцени дека станува збор за неодговорно однесување од страна на компанијата, како и дека чекорите на државата се во насока на избегнување на ситуација на целосна зависност од Руската федерација.

-Ние се залагаме да се либерализираме и сите консултации се завршени и таа обврска што сме ја земале како држава према енергетската заедница, преку регулативите на Европската унија ние веќе ги спроведуваме. Ако ние не донесевме ваква одлука можеме да се доведеме во ситуација за да бидеме целосно зависни од Руската федерација и што ќе се случеше ако преку ноќ имаше забрана за снабдување со природен гас на нашата држава, рече Бектеши.

За министерот, загрижувачки било тоа што „Макпетрол” како компанија не покажала општествена одговорност и информира дека во таа насока било разговарано за носење закон кој ќе го регулира однесувањето на стратешките компании во време на криза.

„Според мене, ова е неодговорно однесување од страна на компанија каква што е „Макпетрол“ и за жал, можно е и да има и надворешни сили кои влијаат врз ваквите одлуки, но ние сме демократска држава, имаме закони ќе постапиме согласно законите, вклучувајќи го тука и Макпетрол. Ме загрижува фактот што една од најголемите компании не покажа ни мала општествена одговорност за сите овие децении што се тоа што го направиле е од овие граѓани. Дополнително разговарав и со претседателот на Владата им дадов задолжение и на правниот тим на Министерството за економија да постапат и да најдеме во што побрз рок законски решенија на начинот како да се однесуваат одредени стратешки компании во време на криза по примерот на другите држави како Германија и Италија“, рече Бектеши.

Тој ја обвини компанијата дека и во минатото покажувала неодговорно однесување.

„Таа е една од најголемите компании не е првпат што прави вакви работи – граѓаните се сеќаваат од времето кога ги затворија бензиските пумпи и не точеа дизел заради тоа што требаше да чекаат само еден ден за Регулаторната комисија за енергетика да донесе нова одлука за зголемување“, појасни тој.

Министерот информира дека денеска било разговарано и најверојатно ќе бидат најдени други опции, затоа што имало простор до 1 јануари.

Во однос на претходните понуди за снабдувачи на гас, доставени од лидерот на ВМРО-ДПМНЕ, Христијан Мицкоски, Бектеши рече дека се неприфатливи затоа што „доаѓаат од Руската федерација“.

Во однос на заинтересираните компании кои во иднина би го вршеле снабдувањето на пазарот, Бектеши рече дека има понуди до ЕСМ, но не откри од каде доаѓаат.

„Макпетрол” претходно соопшти дека од 1 јануари нема да увезува и да испорачува природен гас до своите потрошувачи.