Фудбалерите на Барселона забележаа нов кикс со ремито на „Местаља“, титулата практично и пред Нова година е загубена, но Чави Ернандез не се предава и верува во својот тим. Барселона самата си е виновна за лошите резултати оваа сезона, што потврдуваат бројките.

Каталонците имаат најголем број пропуштени прилики во „Топ 5 лигите“, вкупно 44, а притоа создаваат најмногу – 64. Процентот од 31% реализација на големите прилики ја става Барселона на дури на 76 место во Топ 5 европските лиги (Шпанија, Германија, Франција, Англија, Италија).

Чави сигурно не знаел точно за тие бројки, но апсолутно се согласува дека неговиот тим создава најмногу и пропушта најмногу шанси, што е голема загриженост.

– Можеби сме меѓу најлошите тимови во Европа по ефективност пред гол, иако сме и меѓу оние кои создаваат најмногу шанси. Треба да ја кренеме довербата кај играчите за да бидеме што поефикасни во завршницата. Соблекувалната е вознемирена и разочарана исто како и јас, бидејќи одигравме добар натпревар, но тоа не беше доволно за да победиме. Тренерот мора да биде задоволен кога тимот игра добро, но таквата реализација навистина не е нормална – изјави Чави.

Барселона во среда ја пречекува Алмерија, по што следи кратка пауза, па на почетокот на јануари има гостување во Лас Палмас, потоа почнува „Кралскиот куп“ против нисколигашот Барбастро, а потоа и борбата за првиот трофеј, полуфинале од шпанскиот Суперкуп против Осасуна и потенцијално финале со Реал Мадрид или Атлетико.