Одделението за маркетинг и односи со јавност при Националната опера и балет извести дека билетите за балетската претстава „Дамата со камелии“, чија изведба е на 30 октомври, се распродадени!

Втората изведба на раскошната балетска претстава „Дамата со камелии“, работена по музиката на Џузепе Верди, а драматуршката подлошка е земена од неговата популарна „Травијата“, е на 2 ноември, со почеток во 20 часот.

Претставите ќе се изведат под диригентската палка на гостинот од Ерменија, Едуард Амбарцумјан, кореографијата е на еден од водечките руски кореографи Василиј Медведев, кој работи со големите театри „Бољшој“ од Москва и „Марински“ од Санкт Петербург, a раскошната сценографија и костимографија се на Павол Јураш од Словачка.

Во улогите на Маргарита и Арманд на 30 октомври ќе настапат првенците Марија Кичевска Шокаровска и Франциско Хименес Руиз (Шпанија), додека на 2 ноември ќе настапат Наташа Трендафилова Гицев и Валери Љубенко (Украина).

Во балетската претстава „Дамата со камелии“ настапуваат солистите, балетскиот ансамбл и оркестарот на Националната опера и балет.

– Не е првпат тажната приказна во „Дамата со камелии“ да ги инспирира кореографите. Заедно со костимографот и сценограф, Павол Јураш, сакав претставата да ја направиме класична, традиционална, но и наша оригинална, различна од другите – истакнува кореографот Василиј Медведев.