Американскиот претседател Џо Бајден оцени дека неговиот претходник во Белата куќа, републиканскиот претседателски кандидат Доналд Трамп, е „реална опасност за безбедноста на Америка“ доколку биде избран на 5 ноември.

„Слушајте ме внимателно. Ако победи на тие избори, гледајте што ќе се случи. Тоа е опасно. Тој е вистинска опасност за безбедноста на Америка“, изјави Бајден за Си-Би-Ес.

Бајден се повлече од претседателската трка и ѝ го отстапи местото на потпретседателката Камала Харис.

„Се наоѓаме на пресвртница. Навистина сме во пресврт… а демократијата е клучен елемент“, додаде Бајден во разговорот снимен пред неколку дена во Белата куќа, пренесува „Н1“.

Бајден ја коментираше и дебатата со Трамп.

„За време на таа дебата имав навистина, навистина лош ден бидејќи бев болен, но немам никакви сериозни здравствени проблеми“, изјави тој.

Три недели по дебатата, Бајден на 21 јули објави дека се повлекува од претседателската трка.