Градоначалникот на Општина Гази Баба кој е и актуелен кандидат за втор мандат, Бобан Стефковски, денеска ги информираше жителите на Автокоманда дека е донесено долгоочекуваното Решение за утврдување на режим на зонско паркирање во Автокоманда, со што би се решил еден од најголемите проблеми во населбата.

„Решение кое жителите на Автокоманда го очекуваат повеќе од една деценија. Во моментов интензивно се работи на изработка на проектот за обележување на улиците и поставување на потребната сигнализација, а активностите на терен ќе започнат во најкус можен рок“, истакна Стефковски.

Како што посочи тој во објавата, приоритет ќе добијат жителите на населбата, со што секое домаќинство ќе добие две бесплатни картички за паркирање, но со оглед на тоа што локалните избори ќе се одржат на 19 октомври, односно следната недела, има големи шанси овој проект да биде реализиран по нивното завршување.