Кошаркарите на МЗТ Скопје Аеродром лесно и убедливо го совладаа црногорскиот тим Теодо (68:50) во воведниот меч од новата сезона во АБА 2 лигата, во која покажаа огромна решителност да се изборат за враќање во јадранската елита.

Според тренерот на актуелниот македонски шампион, Васко Атанасов, одбраната беше клучна за остварување на првата победа, а нападот може подобро да функционира:

– Честитки за моите кошаркари за покажаната желба и борбеност, кои ни ја донесоа посакуваната победа. Делувавме одлично во одбраната и тоа беше клучот за триумфот, додека во нападот ни претстои уште работа, што е разбирливо со оглед на тоа што е почеток на сезоната.

Задоволен сум од пристапот и дисциплината, иако верувам дека можеме многу подобро од прикажаното, што, сигурен сум, ќе го покажеме веќе на претстојните натпревари – рече Атанасов.

Ова воедно беше и одлично загревање за претстојниот Суперкуп „Драган Василов-Цевка“, во кој в сабота (28 септември) МЗТ ќе ги одмери силите против Пелистер.