Жена од Тексас е обвинета за обид за убиство откако се обидела да удави тригодишно дете во базен во станбен комплекс, соопшти полицијата. Локалниот огранок на Советот за американско-исламски односи соопшти дека детето му припаѓа на семејство од Палестина и ги повика властите да го истражат инцидентот бидејќи можеби станува збор за злосторство од омраза.

Полицијата на 19 мај добила пријава за тепачка на две жени на базен во станбен комплекс. Очевидци ѝ кажале на полицијата дека пијаната Елизабет Волф (42) се обидела да го удави малото девојче и се расправала со мајката на детето, пишува Си-Ен-Ен.

Мајката во полиција изјавила дека Волф ја прашала од каде е и дали двете деца кои си играле во базенот се нејзини. Советот наведува дека мајката на детето носела хиџаб и покривен костим за капење на базенот.

Според полицијата, Волф почнала да ѝ кажува на жената дека не е Американка, а потоа го грабнала нејзиниот 6-годишен син. Откако момчето успеало да се ослободи, Волф ја грабнала тригодишната ќерка и се обидела да ја удави. Мајката на крајот успеала да ја извлече ќерка си од водата, по што девојчето ја искашлало водата.

„Ние сме американски државјани, по потекло од Палестина и не знам каде би отишла без да се чувствувам безбедна со моите деца. Во мојата земја има војна и тука се соочуваме со омраза. Мојата ќерка е трауматизирана. Секогаш кога ќе ја отворам врата од станот, бега и се крие, се плаши да не дојде госпоѓата пак и да ја удави“, вели мајката.

Пратеникот од Тексас, Салман Бојани, рече дека е шокиран од наводниот расистички и исламофобичен инцидент. „Нема место за омраза ниту во Ојлес, ниту никаде во нашата земја“, рече тој и се заблагодари на полицијата за брзото апсење.