Во кариерата на македонскиот маратонец Александар Илиевски (32) дојде и најголемиот успех, освојувањето на третото место на маратонот Лак Сен Жан (7:18:48 часа), еден од најпознатите во светот, трка што има репутација на најтешка за пливање во Светската серија ултра-маратони. Александар првпат во својата кариера се искачи на подиумот на една трка од Светската серија ултра-маратони.

Илиевски се надмина себеси, ги издржа искушенијата на канадското езеро Сен Жан, ладната вода чија температура се спуштала и до 17 степени, големите бранови, битката со хипотермијата и доплива до подиумот. Резултат за задоволство, но и желба за повеќе. Илиевски сега се подготвува за другите две трки од серијата ултра-маратони. Тоа се Охридскиот маратон (август) и маратонот Капри-Наполи во септември. Тој и таму сака да се искачи на подиумот, што досега не успевал. Ако го оствари тоа, би бил вистински подвиг.

– Навистина Лак Сен Жан е најтежок за пливање од серијата ултра-маратони, не поради километражата (32 км н.з.), туку поради студената вода и брановите. Хипотермијата таму е честа појава. Јас одев да испливам за подиум, ментално се подготвив добро. Ако се убедите себеси дека не ви е ладно, полесно ја поднесувате студената вода – вели Илиевски.

Додатна инспирација бил и наградниот фонд кој е најголем на канадскиот маратон, на кој Илиевски досега настапувал седум пати.

– Важен ми беше и наградниот фонд во Лак Сен Жан. Таму изнесува 55.000 долари. Другите маратони се со помал награден фонд, од 10.000 до 15.000 долари – вели Александар, кој во поголем дел се финансира сам.

Тренер му е Томи Стефановски легенда во нашето маратонско пливање, кому Лак Сен Жан му беше омилен маратон, а таму има и победи.

Илиевски веќе се фокусира на она што претстои, Охридскиот маратон што треба да дојде последната недела од август. Тој и таму посакува да се искачи на подиумот.

– Ако можев да дојдам до подиум во Канада, зошто да не можам во Охрид и на Капри – Наполи? Тоа ми е целта што си ја поставив и ќе дадам се од себе да ја остварам. Сезонава фокусот ми е на овие три трки. Едната помина, други две следуваат. Подготвен сум за нив – вели Илиевски.

– Голема ми е желбата да се качам на подиумот и во Охрид. Тоа особено би било задоволство за мене, затоа што во прашање е и домашна публика и целата спортска јавност во Македонија – вели маратонецот.

Тој минатата година оствари унктатен подвиг, го преплива целото Охридското Езеро кружно, во должина од 71 километар, за 7:21:38 часа.
На маратонот во Канада победи Италијанецот Едоардо Стокино, а втор беше Аргентинецот Франко Касини.