Успешно заврши снимањето на краткометражниот филм „Нова енергија“, кој е реализиран во режија и по сценарио на Сара Климоска, корежисер е Радован Петровиќ, а во продукција на „NEST Продукција“ на продуцентот Јорданчо Петковски.

Филмот „Нова енергија“ ја следи приказната на две најдобри другарки кои низ взаемна емотивна и практична поддршка успеваат да создадат нов заеднички живот бегајќи од токсичноста на нивните партнери.

– Ова е филм кој создава две хероини и преку нив ја слави женската исклучителна и некршлива конекција и нуди свежа перспектива за женските односи која ретко е видена во секојдневните медиуми – посочуваат од „NEST Продукција“.

Главните улоги во филмот ги играат Сара Климоска и Тамара Ристоска, а во филмот учествуваат и Зоран Љутков, Александар Стоименовски, Мирјана Трпковска Костовска и Елена Сековска.

Директорката на фотографија, Бојана Андриќ е една од најзначајните личности во областа на кинематографијата во Србија, позната по својата работа на многу успешни филмови, како и потпретседателка на Светската асоцијација на сниматели ИМАГО.

Филмската екипа брои и талентирани автори како Горан Игњатовски (маскер), Михаил Панев (сценограф), Розе Трајческа (костимограф).

„Нова енергија“ е независен филм реализиран благодарение на приватни донации и компании пријатели на филмот. Копродуценти се „Вижн Тим“ (Vision Team) и „Филмоскопија“ од Србија, „JES Продукција“ и „Контраст филм“ од Скопје, а главни спонзори се „Винарија Тиквеш“, „Спорт Лаб“ и „Монозеро“.

По завршувањето на постпродукцијата, филмот „Нова енергија“ ќе започне со прикажувања на домашни и меѓународни филмски фестивали, а подоцна ќе биде достапен и за пошироката публика, известија од „NEST Продукција“.