Ако се отвори Уставот, ќе се отворат и други прашања, меѓу кои ќе биде и нашето барање да се укине квотата од 20 отсто за употреба на албанскиот јазик, најави деновиве високиот партиски и државен функционер на ДУИ, Артан Груби.

Јетон Шасивари, професор по уставно право на Правниот факултет на Универзитетот на Југоисточна Европа, вели дека намалување на процентот не е решение туку статусот и уставното именување на албанскиот јазик.

– Ова прашање без големи тешкотии би се решило во Основните уставни одредби со преформулирање на членот 7 од Уставот на РСМ со само два нови става, каде што во првиот став би се предвидело дека во РСМ службен јазик е македонскиот и неговото писмо и албанскиот јазик и неговото писмо, а во вториот став би се предвидело дека турскиот, српскиот, влашкиот, ромскиот, босанскиот и другите јазици имаат статус на службени јазици на локално ниво или се јазици во службена употреба на кое било ниво според законот – вели Шасивари за „Слободен печат“.

Според професорот Љубомир Фрчкоски, декан на Универзитетот ФОН, воведувањето целосна рамноправност на македонскиот и на албанскиот јазик на целата територија на земјава и на сите нивоа е спротивно на Охридскиот договор и неприфатливо. Во настап на „Утрински брифинг“ Фрчкоски рече дека отворањето на Уставот, кое го бара ВМРО-ДПМНЕ, ќе повлече и други барања што се поврзани со Уставот, како ова на ДУИ.

– Албанците сакаат да постигнат изедначување на албанскиот и на македонскиот јазик, но тоа е кршење на Охридскиот договор, кој не може сега да се менува. Дури сега ќе видат Македонците колку за нив е добар тој Охридски договор – рече Фрчкоски.

Според него, отворањето на Уставот е тешка работа и не може да се прави во секое време.

Коментирајќи ги иницијативите на опозициската ВМРО-ДПМНЕ за измени на Уставот, вицепремиерот за политички систем Артан Груби рече дека тие треба да се носат со консензус на политичките партии, а не „да се дебатираат во медиумите“.

– Сепак, драго ми е што македонската опозиција е подготвена да го отвори Уставот. Во тој случај, сепак, имаме и други теми што треба да се вклучат во овие уставни измени како што е спорот со Бугарија, или впишувањето на бугарската, хрватската, црногорската заедница и сите други, како и отстранување на ограничувањето од 20 отсто за употреба на албанскиот јазик – изјави Груби.

Исто така, и според СДСМ за сите отворени прашања е потребен широк политички и општествен консензус.

„Ова е уште еден аргумент зошто е потребен поширок политички консензус во државата. Ставот на СДСМ е јасен, за какви било измени на изборниот модел, иницијативи за уставни измени или слично, потребен е широк политички и општествен консензус, одговорија од СДСМ на прашање од „Слободен печат“.