Адвокатите на поранешниот претседател на Косово Хашим Тачи денеска на судењето во Хаг, каде тој е обвинет за воени злосторства, рекоа дека Тачи не ја контролирал Ослободителната војска на Косово (УЧК/ОВК) во времето кога се случиле убиствата, киднапирањата и мачењата на Срби и Албанци кои биле негови политички противници.

Одбраната на Тачи тврди дека тие злосторства биле последица на „неконтролирани локални активности“.

Тачи и тројцата други обвинети, сите истакнати команданти на УЧК и поранешни високи косовски политичари, одговараат по десет точки на обвинението за прогон, убиства, мачења и присилно исчезнување на луѓе за време и набрзо по конфликтот во 1998-1999 година кој доведе до еднострано прогласување независност на Косово од Србија.

Тачи пред Специјалниот суд за воени злосторства рече дека чувствува „тага и болка“ за сите жртви во конфликтот.

„Хашим Тачи не ја контролирал УЧК, командантите на зоните биле во контрола“, рече адвокатот Грегори Кехо на вториот ден од судењето на Тачи. Обвинителите во понеделникот наведоа дека обвинетите воделе „насилна кампања против политичките противници и малцинските етнички Срби и Роми“, за да стекнат целосна контрола врз Косово.

Стотици нивни жртви биле сместени во затвори низ Косово во страшни услови, а 102 биле убиени, според обвинението. Повеќето од жртвите биле Албанци кои не се согласувале со Тачи и неговите политички и воени методи. Според одбраната, Тачи не негира дека злосторствата ги извршиле Албанци.

„Но, тој не признава дека злосторствата биле извршени како политика на лидерите, како што тврди обвинителството“, рече Кехо.

Одбраната тврди дека Тачи, освен што немал контрола над УЧК, „немал ни мотив да ги врши воените злосторства бидејќи знаел дека ќе ја изгуби поддршката од Западот, особено од Соединетите Американски Држави“.

Хашим Тачи се изјасни како невин пред судот во Хаг