Продажба на нови патики кои изгледаат истрошени не е новост. „Рибок“ (Reebok) лансираше едни вакви патики во 2022 година , а „Голден гус“ (Golden Goose) изгради прилично популарен бренд базиран на патики кои изгледаат токму така. Плус, сè што е винтиџ е повторно популарно во последно време, па не е изненадувачки потегот на „Адидас“ (Аdidas) да се приклучи на овој тренд, пишува хрватски „Индекс“.

Брендот го претстави Ултрабуст лајт (Ultraboost Light) изданието на патики кои изгледаат како некој веќе да ги износил. Горниот дел е текстилен и, според брендот, се прилагодува додека трчате. Покрај тоа, овие патики се направени од најмалку 20 отсто рециклирани материјали.

Адидас Ултрабуст лајт првпат се појавија на пазарот на почетокот на 2023 година. Патиките се прогласени за едни од најлесните чевли за трчање, благодарение на новиот среден ѓон Буст (Boost) кој е 30 отсто полесен од претходните.

„Грозни се и се надевам дека ова е шега“, „Изгледаат како да треба да ги фрлам во машината за перење“, „Конечно мој тип на патики“, „Не“, „Веќе ги имам овие дома“, „Им снемува идеи“, „Би ги носел само по дома“, се дел од коментарите на Инстаграм за новите патики.

Засега овие патики се достапни на некои веб-страници на адидас и во одбрани онлајн продавници, а цената е 200 евра.