Денеска се одигра првиот натпревар од второто квалификациско коло во Лигата на шампионите во кој Динамо Загреб на домашен терен со 2:0 ја совлада Омонија.

Непосредно пред крајот на првото полувреме поради повреда во редовите на хрватската екипа мечот предвреме мораше да го напушти Аријан Адеми, а на негово место влезе Ј. Мишиќ.

Погодоците беа постигнати во вториот дел, првиот беше дело на Мајер во 65 минута, а во 81 минута кипарската мрежа ја затресе Јакиќ.

За „модрите“ целата средба ја одигра вториот македонски репрезентативец Стефан Ристовски кој одлично ја одработи својата задача во одбраната.

Играчите на тренерот Крзнар се поблиску до третото квалификациско коло во ЛШ каде што доколку претходно ја прескокнат пречката Омонија, ќе играат со победникот од дуелот Легија Варшава – Флора.

Се одиграа уште неколку мечеви од 2. квалификациско коло во Лигата на шампионите (први натпревари): Алашкерт – Шериф Тираспол 0:1, Линколн Ред Импс – Клуж 1:2 и Ференцварош – Жалгирис 2:0.