Со зголемувањето на трошоците за живот и глобалната економска несигурност, некои открија дека преселбата во странство може да биде начин да дојдат подобар квалитет на животот со помалку пари.

Виетнам е најдостапната земја во светот за доселениците петта година по ред.

Оваа земја е убедливо најповолна за странците и е рангирана на прво место од 46 дестинации според таканаречениот индекс на лични финансии, според студијата „Икспат инсајдер“ (Expat Insider) за 2025 година спроведена од „ИнтерНејшн“ (InterNations), онлајн платформа и глобална заедница за емигранти.

Студијата, која се спроведува од 2014 година, собрала увиди од повеќе од 10.000 иселеници кои претставуваат 172 националности кои живеат низ целиот свет, објавува „Си-ен-би-си“.

Топ 10 најповолни земји

Азиските земји доминираат на листата кога станува збор за поволни лични финансии за емигрантите, а пет од топ 10 земји се од југоисточна Азија: Виетнам, Тајланд, Индонезија, Филипини и Малезија.

„Во споредба со 2024 година, девет од првите 10 земји ја задржуваат оваа титула. Само Малезија (на деветтото место) е нова, откако се помести од 11-то место минатата година“, се наведува во извештајот.

Забележливо е дека ниедна европска земја не се нашла на листата.

Најприступачни дестинации во 2025 година, според податоците на „ИнтерНејшн“:

1. Виетнам
2. Колумбија
3. Панама
4. Кина
5.Тајланд
Индонезија
Филипини
Мексико
Малезија
Бразил

Во Виетнам, 89 отсто задоволни имигранти

Од учесниците во анкетата било побарано да го оценат своето задоволство од финансиската ситуација, општите трошоци за живот и дали нивниот расположлив приход во домаќинството е доволен за да водат удобен живот во земјата на престојување. Со вкрстување на одговорите, бил добиен индексот на личните финансии.

Во Виетнам, 89 отсто испитаници биле задоволни од општите трошоци за живот, додека 87 отсто од испитаниците рекле дека нивниот расположлив приход во домаќинството е доволен или повеќе од доволен за удобен живот, во споредба со 40 отсто и 69 отсто на глобално ниво, според извештајот.

Тој финансиски простор може да објасни и зошто 54 отсто од нив живеат таму пет или повеќе години, а 30 отсто сакаат да останат засекогаш, се наведува во извештајот.

Во Колумбија, мнозинството испитаници рекле дека нивниот расположлив приход е доволен за удобен живот- дури 92 отсто (во споредба со 69 отсто на глобално ниво).

Исто така, ниту еден иселеник во земјата не ги навел трошоците за живот како главна грижа пред да се пресели, што е во спротивност со глобалниот просек од 21 отсто.

Во меѓувреме, Панама е особено популарна меѓу пензионерите – 35 отсто од оние што се преселиле таму веќе биле во пензија во тој момент, во споредба со само 11 отсто на глобално ниво, покажале податоците.

Најмалку достапни земји

Податоците од „ИнтерНејшн“, исто така, покажале кои се најмалку достапните земји за иселениците во 2025 година – ова се првите 10:

1. Канада

2. Велика Британија

3. Финска

4. Турција

5. Катар

6. Сингапур

7. Јужна Кореја

8. Ирска

9. Австралија

10. Норвешка.