Грипот зема уште седум жртви
Во текот на изминатата недела, регистрирани се 7 смртни случаи асоцирани со грип, два од нив со датум на смрт во претходните две недели, информира Институтот за јавно здравје.
Се работи за 3 лица од Скопје, две од Кичево и по едно лице од Ресен и Валандово. Возраста на починатите се движи од 37-82 години.
Кај 5 лица е утврдена претходна хронична болест, односно постоење на ко-морбидитет.
Кај 43% од починатите потврден е А(H1pdm) вирусот на грип, популарно наречен свински грип.
Во текот на последната недела (11.03-17.03.2019), во Република Северна Македонија се пријавени 1.573 случаи на грип, што е за 35,2% намалување во споредба со минатата недела.
Во сезоната 2018/2019 вкупниот број на заболени од грип изнесува 19.204.
Во текот на сезоната 2018/19, регистрирани се вкупно 22 смртни случаи асоцирани со грип, на возраст од 5 до 86 години. Најголем број од починатите лица се жители на подрачјето на Скопје (12), 3 лица се од Охрид, 2 од Кичево и по еден смртен случај е пријавен во Кавадарци, Делчево, Тетово, Ресен и Валандово. Кај 17 лица е утврдено постоење на коморбидитет.