Поради климатските промени топлотните бранови стануваат сè почести и подолготрајни низ целиот свет. Нарушувањата поврзани со главоболката влијаат на приближно 40% од населението, или 3,1 милијарди луѓе. Половина од луѓето со мигрена ги наведуваат временските услови како еден од предизвикувачите на главоболка, вели Елизабет Лодер, раководителка на одделот за главоболка во болницата Бригам.

Еве што треба да знаете за главоболките предизвикани од жештините и како да ги избегнете.

Дали топлината навистина може да предизвика главоболки?

Експертите се согласуваат дека топлината може да биде една од главните причини, иако појавата на главоболки често е комбинација од сложени фактори на животната средина. Високите температури често се придружени со промени во воздушниот притисок, директна изложеност на сонце и влажност, а овие промени во животната средина можат да предизвикаат главоболки кај лицата кои страдаат од мигрена.

„Мозокот со мигрена не сака промени. Сака да спиете во исто време, да јадете исто. Значи, големите промени во температурата и временските прилики не влијаат добро на мигрената“, вели Џесика Аилани, невролог и директорка на Центарот за главоболка во MedStar Georgetown.

Експертите не се сигурни за точниот механизам преку кој топлината може да предизвика главоболки, иако топлината може да предизвика процеси за кои е познато дека предизвикуваат главоболки. Екстремната дехидратација може да предизвика собирање на мозокот и крвните садови што го обложуваат мозокот, што може да доведе до физичка болка, рече Лодер.

Во екстремни случаи, топлината може да влијае на функцијата на мозочните неврони, според неврологот од клиниката Мајо, Нарајан Кисун.

„Променетата функција на клетките доведува до зголемена активност во центрите за болка во мозокот“, рече тој.

„Малку е веројатно дека топлината ќе предизвика главоболки кај оние кои вообичаено не страдаат од неа“, објасни Лодер. Во тие случаи, главоболката предизвикана од високи температури може да биде знак за посериозна болест поврзана со топлината, како што се топлотна исцрпеност или топлотен удар, рече Лодер. Важно е рано да се препознаат овие симптоми, да се остане хидриран и да се најде место за разладување.

Што можете да направите за да ги ублажите симптомите?

Главоболката предизвикана од топлина, особено ако не страдате од мигрена, е знак дека работите би можеле да се влошат. Тргнете се од жештината и обидете се да се разладите со ладен пијалак или облога со мраз. Побарајте климатизација во затворен простор или искористете ги предностите на климатизираните трговски центри. Пијте вода и електролитни пијалаци за да му помогнете на вашето тело да се опорави. Додадете електролити во водата со попрскување сол или сок од лимон. Потоа можете да користите стратегии кои обично ви помагаат да се справите со главоболката – како што е лежење во темна соба со затворени очи, рече Лодер.

Доколку мора да бидете надвор, очилата за сонце можат да бидат корисна превентивна мерка, додаде таа.