Најдобро е да пиеме вода кога сме жедни, но според нутриционистите, најголемиот дел од течноста треба да се внесе пред 16 часот. Така се намалува веројатноста да се будиме ноќе за да одиме во тоалет, што придонесува за подобар сон и оптимална хидратација во текот на денот, пишува „Е-клиника“.

Предности од пиење вода порано во текот на денот

Спортските нутриционисти понекогаш препорачуваат професионалните спортисти да испијат 80 отсто од потребната количина вода пред 16 часот. Раното пиење вода го поттикнува варењето и ја надоместува течноста изгубена во текот на ноќта, вели Кајси Ваврек, магистер по науки и спортски нутриционист при Медицинскиот центар „Векснер“ на Универзитетот Охајо. Таа додава дека водата може рамномерно да се внесува во текот на денот – малку наутро, а навечер уште помалку.

Јулија Зумпано, диететичарка од Клиниката Кливленд, советува да се избегнува започнување на денот со кафе, бидејќи тоа може да предизвика дехидрација. Наместо тоа, препорачува денот да започне со вода, а кофеинот да се внесе малку подоцна.

Зумпано додава дека намалувањето на внесот на вода неколку часа пред спиење може да придонесе за поквалитетен сон:

„Препорачувам минимален внес на вода два часа пред легнување, за да се избегне будење во текот на ноќта и одење во тоалет, што кај некои лица го нарушува сонот“, објаснува таа.

Како да препознаеме дека не внесуваме доволно вода?

„Прераното запирање со пиење течности може да доведе до дехидрација, главоболки, грчеви или намалени физички перформанси“, предупредува Ваврек.

Ова е особено ризично за лица кои вежбаат во попладневните или вечерните часови.

„Ако спортист тренира попладне или навечер, неопходно е да внесува доволно течности за време на и по тренингот“, додава Ваврек.

Знаци на дехидрација:

• Темно жолта или килибарна урина
• Магливост во умот
• Ниско ниво на енергија или зголемен замор
• Сува уста
• Главоболки
• Запек
• Мускулни грчеви
• Вртоглавица

Како да препознаеме дека внесуваме премногу вода?

Ако се напиеме премногу вода, можеме да забележиме:

• Често мокрење (почесто од еднаш на час)
• Надуеност
• Мачнина
• Проѕирна, безбојна урина
• Будење во текот на ноќта поради потреба за мокрење

И дехидрацијата и преголемата хидратација се сериозни здравствени состојби, па затоа е важно да се најде соодветен баланс за телото да добива оптимално количество вода и да остане здраво.