Извршниот директор на Меѓународниот олимписки комитет (ИОК), Кристоф Дуби, тврди дека ќе биде воспоставена шема за да им се овозможи на гледачите да присуствуваат на ЗОИ Пекинг 2022 година и изрази надеж дека посетеноста би можела да биде до 30 отсто капацитетот.

Присуството на гледачи на Пекинг 2022 беше неизвесно во подготовките на Игрите, особено по појавата на омикрон варијантата на ковид-19.

Навивачи од странство ќе нема, а организаторите одлучија да не пуштаат билети во општа продажба поради загриженоста од коронавирус.

Неколку населби во Пекинг се затворени по случаи на ковид-19, вклучително и местото Анженли во областа Чаојанг, клучна област за Зимските олимписки игри.

– Ќе се погрижиме да имаме присуство на гледачи на трибините, а во исто време да имаме безбедност за сите учесници. Во однос на капацитетот, сè уште не сме решиле, затоа што треба да се прилагодиме зависно од локациите, но кога би можеле да обезбедиме 30 отсто капацитет би било одлично – вели Дуби.

Присуството на гледачите ќе зависи од тоа дали организаторите ќе можат да го задржат системот на „балон“ одржувајќи ги учесниците на Игрите одделени од општата популација.