Менаџерот на Астон Вила, Унаи Емери, не сака големи промени за време на кој било преоден рок, но тој ќе мора уште еднаш да ја освежи својата напаѓачка линија откако Ал Итихад даде понуда од 60 милиони евра за напаѓачот Муса Диаби која беше прифатена од клубот, пренесува „Гардијан“. Лекарските прегледи веќе се закажани за крајот на оваа недела.

Напаѓачот, кој минатото лето беше купен од Баер Леверкузен за 55 милиони евра, постигна 10 гола и запиша девет асистенции на 54 натпревари, а на Вила Парк чувствуваат дека им треба напаѓач од врвна класа за Лигата на шампионите.

Затоа Емери веднаш стапи во контакт со Жоао Феликс кој по завршувањето на позајмицата во Барселона мора да се врати во Атлетико Мадрид. Каталонците не можат да се договорат со „јорганџиите“ околу купувањето, иако се чини дека се откажаа од тоа, со оглед дека фокусот им е да го доведат Нико Вилијамс од Атлетик Билбао, а за тоа ќе им требаат многу пари. .

Цената за Астон Вила и Барселона не е иста, сигурно клубот од главниот град на Шпанија ќе гледа да извлече што повеќе од вложените 120 милиони евра во 2019 година. Сепак, цената на Феликс е драстично намалена во последните две сезони, па англиските медиуми истакнуваат дека Астон Вила се надева дека ќе го ангажира играчот за 30 до 40 милиони евра.

Жоао Феликс ја вкуси Премиер лигата играјќи за Челси шест месеци. Иако тоа беше најхаотичниот период за клубот во последните 20 години, Португалецот постигна четири гола на 20 натпревари.