Животот со славна ѕвезда може да биде повеќе проклетство од благослов, а животот на поранешната сопруга на кралот на рокенролот, која е родена на денешен ден, 24 мај 1945 година е доказ за тоа.

Елвис Присли беше музички гениј, а неговата сопруга, 10 години помладата Присила, убавица со ангелско лице, е единствената жена на која тој ѝ понудил брак. Дури и по расправии, разделби, па и по разводот, таа секогаш изјавуваше дека тој е љубовта на нејзиниот живот.

Исто така, во неколку наврати Присила изјавила дека пред сопругот не смеела да излезе несредена – без шминка и фризура.

Совршена жена

Се запознале во 1959 година на забава што ја приредил Елвис, кој тогаш служел војска и имал 24, а Присила 14 години. Воодушевен од нејзината убавина, тој ѝ отсвирел неколку песни, а откако заминала од забавата, таа си помислила дека никогаш веќе нема да го види популарниот пејач.

Но, се излажала. Елвис, кој забележал дека девојката многу наликува на неговата почината мајка Гледис, набрзо по забавата ја повикал на состанок и ја бакнал. Родителите на Присила биле загрижени поради разликата во години и поради тоа што таа била малолетна, но откако го запознале Елвис, толку се воодушевиле од него, што заборавиле на грижите.

Елвис тогаш му рекол на свој пријател дека „Присила е толку млада, што може да ја обликува како ќе посака“.

Во меѓувреме девојката толку се вљубила во него, што тој бил центарот на нејзиниот свет. Почнале да се забавуваат, е Присила се шминкала и ја позајмувала облеката од мајка ѝ за пријателите на Елвис да помислат дека има барем 16 години. Во неговата вила секоја вечер се одржувале забави. Сите седеле и чекале во приземјето да се појави Елвис. Кога тој ќе се појавел, замолчувале и чекале да прозбори прв, за да знаат во какво расположение е. Ако се насмеел, сите се смееле.

– Никој, дури ни јас, не се осмелувавме да се пошегуваме, освен ако тој не се насмееше и тогаш сите се смеевме – изјави во едно интервју Присила и откри дека ноќе кога сè било мирно, тој ѝ опишувал како за него изгледа совршената жена и дека таа е таква.

– Сакаше темнокоси со сини очи. Сакаше да ме обликува по свој вкус. Тоа му беше многу важно – зборуваше Присила.

Елвис ја ценел нејзината младост и чистота и бил подготвен да ја чека да порасне. Но, во текот на нивната врска тој бил и со други жени.

Она што многумина го забележувале е дека брачната двојка многу си личи, а тоа било очекувано со оглед на тоа дека Елвис ја „обликувал“ Присила по својот лик. Ја натерал да ја бојадиса косата црна, како неговата, и потоа да ја обликува така што ќе потсетува на неговата фризура. Поради тоа Присила себеси се опишувала како „живата кукла на Елвис“.

Елвис бил најважен

Таа открила дека никогаш не се појавувала пред сопругот без фризура и шминка, бидејќи тој не сакал да ја види како се дотерува, туку сакал да го види само конечниот резултат. А вљубената Присила правела сè за да го усреќи. Не ѝ било важно што таа сака и дали има проблеми, само Елвис бил важен.

По венчавката Присила набрзо забременила, а Елвис се загрижил како родителството ќе влијае на неговата кариера, поради што побарал „пауза во бракот“ кога таа била во седмиот месец од бременоста. Откако Присила ја родила ќерката Лиза Мари, тие се смириле. Но, по породувањето Присила дознала дека сопругот ги продолжил врските со други жени и по венчавката. Таа не сакала веќе да биде како негово верно милениче кое чека тој да дојде кај неа. По шест години брак се развее, а во интервјуа дадени потоа, Присила признала дека се развела затоа што сакала „да го открие светот“.

– Очигледно немав тинејџерски години како нормална девојка, па морав да се приспособам. Го следев само она што тој го правеше. Го живеев неговиот живот. Искрено, немав свој живот, па некако се изгубив – изјавила таа.

По разводот, бившите сопружници го поделиле старателството над ќерката и редовно се гледале. Кога Присила дознала за смртта на Елвис, била скршена од болка и ѝ требало долго време да закрепне и да продолжи. Таа го задржа неговото презиме, но ги смени фризурата и начинот на шминкање. Отвори бутик и глумеше во неколку серии и филмови.

Присила денес има 79 години и со задоволство се сеќава на бракот со Елвис, за кој до ден-денес вели дека бил љубовта на нејзиниот живот.