На улицата „Мирче Оровчанец“ во центарот на Скопје, во близина на Универзална сала, градежна фирма која гради зграда ја забетонирала цевката за фекалната канализација, пишува „СДК.мк“.

Додека ја правеле јамата и копале за поставување на армирано бетонски колови, т.н. „шипови“, работниците ја пресекле цевката за канализација. Потоа, додека полнеле со бетон, ја забетонирале и цевката за одвод. Во околните згради и куќи сега фекалиите се закануваат да се вратат во домовите на луѓето преку клозетските шолји.

Екипи од ЈП „Водовод и канализација“ денеска се обидувале да најдат решение за големата нужда во која се најдоа жителите на улицата. Тие, според „СДК“, велат дека сега цевката мора да се сече, да се извади и да се постави нова. Дополнителен проблем им претставува тоа што над цевката за фекалии е поставена цевка за парно, иако тоа не смее да се случува, односно таа треба да е паралелна со канализациската.

Од Општина Центар велат дека се запознаени со случајот, кој жителите на улицата веќе го пријавиле. Додека се реши проблемот, поставени се пумпи кои спречуваат фекалиите да течат низ домовите на луѓето.

„Ние во овој случај немаме надлежност туку ЈП ‘Водовод и канализација‘ ќе интервенира, односно работи на решавање на проблемот. Штетата, односно интервенцијата на‚‘Водовод‘ треба да ја плати инвеститорот, а јавното претпријатие може да поднесе тужба бидејќи оштетена е нивната мрежа“, велат од Инспекторатот на Општина Центар.

Од Инспекторатот имале средба и со жителите на улицата и им било сугерирано да поднесат тужба до инвеститорот.