Жител на село во околината на Тетово вчера пријавил во полиција дека бил измамен, откако му дал на друг човек полномошно за транспорт на автомобил од Германија, но тој му го продал во друго село, соопшти МВР.

„На 09.09.2025 во 15:30 часот во СВР Тетово, 49-годишник од тетовско село пријавил дека бил измамен од лицето Б.„Н“ за сума од 5.000 евра. Според пријавеното, во мај 2025 година во Сојузна Република Германија тој се договорил со лицето да му го даде неговото „фолксваген голф“ за да го транспортира во РСМ. Како што е пријавено, откако му дал полномошно само за транспортирање, лицето без негово знаење и согласност ја средило царинската документација, најверојатно со фалсификување, по што возилото му го продало на друго лице од тетовско село. Се преземаат мерки за расчистување и документирање на случајот“, пишува во полицискиот билтен.