Комисијата за спречување и заштита од дискриминација (КСЗД) утврди директна дискриминација во оглас за финансиски менаџер, објавен на Вработување.мк од скопска фирма. Во огласот, како што пишува Сакам да кажам, било наведено дека се бараат исклучиво жени на возраст од 24 до 40 години, кои немаат деца, не планираат да имаат или немаат новороденчиња, како и жени кои не се на студии.

По претставка од една жена, која укажала на дискриминација и по основ на пол и возраст, КСЗД утврди дека станува збор за директна дискриминација врз основа на пол, мајчинство, семејна и брачна состојба.

Фирмата, според Комисијата, тешко го повредила Законот за работни односи. Ѝ е наложено во иднина да се воздржува од вакви огласи, во спротивно ќе биде дадена на суд.

Подносителката на претставката навела дека возраста и родителскиот статус не можат да бидат критериум за професионалност. Таа посочила и дека условите создаваат непријателска работна средина и недоверба кон родилки или жени што сакаат да го продолжат образованието.

Од фирмата во одговорот до КСЗД навеле дека немале намера да дискриминираат, туку сакале да го опишат „идеалниот профил“ на кандидатка за вработување.

Целата одлука на КСЗД е достапна на следниот линк.