Агенцијата за храна информираше дека на Фејсбук на диво преку страницата „ЗеолитМК“ нелегално се продава додаток во исхраната зеолит (Zeolit Klinoptilolit). За да го добиете конкретниот додаток во исхраната кој не е ниту регистриран ниту одобрен од Агенцијата за храна и кој нема гаранција за безбедноста, треба да платите 750 денари за пакување од 800 грама, а испораката е преку карго.

Агенцијата за храна и ветеринарство освен што објавува дека овој производ е нерегистриран и се продава на диво преку посочената страница на Фејсбук, не презела ништо друго за да ги санкционира дивите продавачи.

Што голтаат граѓаните кога земаат суплементи купени на интернет од неовластени продавачи?

Индустријата за додатоци во исхраната продолжува да го окупира македонскиот пазар на нелегални начини, преку нерегулирана продажба за која ниту некој одговара, ниту пак некој ги контролира супстанците што се во составот на производите. Продажбата на црно ги живее своите најдобри денови, а ризикуваат оние што купуваат на интернет. Во меѓувреме, мегаломанските здравствени тврдења за овој производ одат дотаму што кога се продава се рекламира дека „вода со зеолит лекува сто болести“. Во рекламните материјали на Фејсбук, исто така се наведува дека зеолитот е „стопроцентно природна супстанца“.

Но, како што открива „Слободен печат“, дел од овластените фирми за производство на зеолит, во 2017 година овозможиле опасен зеолит да се најде во македонски погон како суровина од која подоцна се правел нанозеолит. Станувало збор за зеолит и нанозеолит контаминиран со олово. Така, според документите коишто ги поседуваме, во март 2017 година државен инспектор за храна зел примероци за анализа на производот „нанозеолит“ од три серии кои покажале зголемено присуство на олово и не одговарале на прописите за безбедност. Во одговорната фирма инспекторите зеле и примероци на суровината „зеолит“ која исто така покажала зголемено присуство на олово и не одговарала на прописите за безбедност на додатоците на храна. Фрапантни илјада килограми од овој зеолит  што го начекале инспекторите во погон за производство и кој требало да заврши како краен производ „нанозеолит“ бил забранет за понатамошна употреба и била издадена наредба да биде уништен во Дрисла. Оваа информација влева сомнеж и во зеолитот од овластени продавачи во земјава.

Законот за безбедност на храната предвидува операторот со храна одговорен за малопродажба и дистрибуција, кој нема влијание на пакувањето, означувањето, безбедноста или интегритетот на храната да мора да ја повлече или уништи храната што не е во согласност со стандардите, но во конкретната ситуација, фирмата не го уништила целиот нанозеолит, па била казнета парично со з.500 евра глоба и 1.050 евра за одговорното лице.

Особено е страшно, затоа што зеолитот го користат претежно пациенти на хемотерапија, па и тие биле изложени на ризикот да го купуваат оловниот производ.

Од Агенцијата за храна и ветеринарство велат дека поради се поинтензивната дива продажба на храна и додатоци во исхраната на интернет, најчесто преку социјалните мрежи, самите граѓани се тие што треба да бидат свесни и одговорни потрошувачи кога пазарат преку интернет.

„Зачестена е продажбата на непроверени, често и небезбедни производи преку социјалните мрежи од страна на нерегистрирани и неодобрени оператори. За производите нема гаранција за безбедноста и истите може да бидат и опасни по човековиот живот и здравје“, велат од АХВ.

Инспекторите на Агенцијата за храна и ветеринарство ја контролираат само работата на одобрените односно регистрираните оператори со храна, односно само на оние што се внесени во легалниот синџир на производство и трговија, вклучително и на оние кои вршат електронска продажба на своите производи. Тие преку Одделението за спречување на измами со храна и во соработка со полицијата и Обвинителството преземаат активности за откривање на веродостојноста на профилите на лицата кои продаваат производи преку интернет и на социјалните мрежи.

Оттаму ги повикуваат граѓаните пред да решат да купат  храна или додатоци во исхраната преку интернет или социјалните мрежи, во регистрите кои ги води АХВ да проверат дали операторите кои ги нудат ваквите производи се регистрирани, дали здравствените или нутритивните тврдења кои се истакнуваат на производите се одобрени или не, односно дали производите се под контрола на инспекциските служби на Агенцијата.

„До производителите или трговците кои нудат производи преку интернет и социјалните мрежи, а кои не се регистрирани, апелираме да го легализираат производството, односно да се регистрираат како оператори со храна. Како одговорна институција за безбедноста на храната и здравствената заштита на животните, ги повикуваме граѓаните да не наседнуваат и да не купуваат непроверени и небезбедни производи кои се нудат преку социјалните мрежи од нерегистрирани и неодобрени оператори. За секоја недоследност, потрошувачите можат да ги известат надлежните инспекциски служби на Агенцијата“, апелираат од Агенцијата.

Зеолит е минерален комплекс кој се добива од вулкански карпи, односно збир од неколку различни минерални компоненти, меѓу кои натриумови, калиумови, алуминиумски и калциумови. Супстанцата станува активна по механичката обработка и потоа може да се користи во медицината и фармацијата.