Украинскиот претседател Володимир Зеленски ја отфрли можноста Украина да се откаже од кој било дел од територијата во замена за потенцијален мировен договор со Русија.

Во интервју за „Би-би-си“ пред годишнината од почетокот на руската инвазија, Зеленски предупреди дека отстапувањето на територијата би значело дека Русија би можела „да продолжи да се враќа“ во Украина, додека западното оружје, според него, ќе помогне да се доближат до мирот.

Зеленски предупреди дека планираната пролетна офанзива на руските сили веќе е започната. „Руски напади веќе се случуваат од неколку правци“, рече Зеленски.

Сепак, тој верува дека украинските сили сè уште можат да се спротивстават на напредокот на руските трупи додека не бидат подготвени да започнат контраофанзива – иако тој ги повтори повиците до Западот да испрати поголема воена помош за Украина.

„Се разбира, модерното оружје може да го забрза мирот. Оружјето е единствениот јазик што Русија го разбира“, изјави Зеленски за Би-Би-Си.

Претседателот на Украина минатата недела имаше разговори со лидерите на Обединетото Кралство и Европската унија во обид да ја зајакне меѓународната поддршка и да побара модерно оружје за одбрана на неговата земја.