Украинскиот претседател Володимир Зеленски му побарал ракети „Томахавк“ на американскиот претседател Доналд Трамп за време на приватен состанок, објави британски „Телеграф“.

Украинскиот претседател му кажал на својот американски колега дека овој високо-технолошки систем на оружје би помогнал да се доведе претседателот Владимир Путин на преговарачка маса за да се дискутира мировен договор.

Неколку извори за британскиот медиум рекле дека барањето било упатено на состанокот меѓу двајцата лидери што многумина го оценија како исклучително позитивен, одржан на маргините на собирот на Обединетите нации.

Во интервју по состанокот, Зеленски рече дека Трамп бил склон да ја прифати неговата молба за долготрајната крстосувачка ракета, која би ја ставила Москва во дострел на ударите од Киев.

ВИДЕО | Зеленски до Русите: Запрете ја војната или најдете засолништа, имам поддршка од Трамп за удари во Русија

Одделно, дипломатски извори рекле дека државниот секретар на САД, Марко Рубио, им рекол на европските колеги дека промена на тонот на Трамп во врска со Украина треба да се толкува „најпозитивно што може“.

Рубио пренел и дека американскиот претседател бил „навистина бесен“ на Путин поради тоа што ги игнорирал неговите обиди да се стави крај на војната долга три и пол години.

Не е сигурно дали обидите на Зеленски да обезбеди ракети „Томахавк“ од САД ќе бидат успешни.

Со дострел до 2.500 километри и боева глава од 450 килограми, оваа крстосувачка ракета е далеку поефикасна од кое било слично далекопсежно оружје, донирано на Киев од западните сојузници.

Зеленски: Ќе ги вратиме изгубените територии преку дипломатија, а не со сила