Во издание на „Студентски сервис“ – Скопје од печат излезе книгата „Во знакот на пчелата“ на м-р Елизабета Кузмановска – новинар на Македонската телевизија и на проф. д-р Милан Јазбец – еден од најзначајните словенечки дипломати и амбасадор на Република Словенија во нашава земја од 2016 до 2020 година, универзитетски професор по дипломатија, писател, поет и некогашен истакнат словенечки новинар, автор на седумдесетина книги од областа на дипломатијата и литературата и на повеќе од 140 научни трудови.

Книгата е, всушност, своевиден зборник на трудови од научниот симпозиум по повод промоцијата на книгата „Поклон пред бардот на македонскиот журнализам: Свето Стаменов“ на проф. д-р Милан Јазбец, што беше одржана на 27 април 2023 година во Домот на АРМ – Скопје.

Во зборникот се застапени излагањата на промоторите: проф. д-р Васил Тоциновски („Книга за новинарот и публицист Свето Стаменов“), проф. д-р Цане Т. Мојаноски („Една книга – бројни сведоштва и факти за делото на Свето Стаменов“), проф. д-р Димитар Пандев („Новинарството нема форма, зашто има норма“), Зоран Иванов („Грандиозен македонски научно-документаристички фонд“), проф. д-р Трајан Гоцевски („Да се поклониме и ние пред делото на журналистот Свето Стаменов“) и проф. д-р Елена Јованова Грујовска („Средба на титаните или Милан Јазбец и Свето Стаменов во ’Поклон пред бардот на македонскиот журнализам: Свето Стаменов‘“, потоа текстовите на проф д-р Вера Стојчевска Антиќ („Извонреден пример на успешен новинар“), Мишо Китаноски („Свето Стаменов или нашиот незаменлив собирач на македонската научна мисла“) и проф. д-р Љупчо Кеверески („Богато содржинско професионално издигнување во времето и просторот“), како и обраќањата на авторите на книгата: м-р Елизабета Кузмановска („Зошто ’Во знакот на пчелата’“) и проф. д-р Милан Јазбец („Рокенролот како инспирација, пчеларството како вокација“) и на јубиларот Свето Стаменов („Да почнеме конечно да се цениме меѓу себе“).

Главната поента на сите излагања е да се претстават личноста и делото на, како што говори и самиот наслов на книгата што беше промовирана, бардот на македонскиот журнализам Свето Стаменов кој, како што истакнува проф. д-р Јазбец во својата воведна студија „Свето Стаменов: журнализмот како вокација, определба и живот“, во која ги разоткрива феноменот Свето Стаменов, начинот и елементите на неговото професионално созревање и творештво, со своите повеќе од 3.000 интервјуа со државници, политичари, дипломати, универзитетски професори и личности од политичкиот, стопанскиот, јавниот и културниот живот во земјава и во странство ја „разви категоријата интервју до тешко достапни височини“ и токму затоа, „интервјуто е тоа со кое Свето Стаменов го создаде својот бренд и интервјуто е тоа кое од Свето Стаменов создаде бард“.

Свето Стаменов – политиколог, новинар на Македонското радио – Радио Скопје, е еден од првите македонски воени репортери од боиштата во Хрватска и Босна и Херцеговина во почетокот на деведесеттите години на минатиот век, антологичар, хроничар на македонската современост и несомнено еден од најпознатите и најплодни македонски публицисти во последните две и пол децении, автор, коавтор и приредувач на повеќе од 50 книги од областа на меѓународната и внатрешната политика, одбраната и безбедноста, евро и евроатлантските интеграции, меѓукултурниот и меѓуцивилизацискиот дијалог, културата, литературата и, особено, македонскиот стандарден јазик.

Инаку, „Во знакот на пчелата“ е прва книга објавена во новопокренатата едиција „Документи“ на издавачот „Студентски сервис“.

(Текстот е објавен во „Културен печат“ број 200, во печатеното издание на весникот „Слободен печат“ на 14-15.10.2023)