Институтот за македонска литература (ИМЛ) при УКИМ – Скопје на 22 декември го промовираше обемниот Зборник на трудови од меѓународната научна конференција „Македонска книжевна архива: од ракопис до дигитална култура“.

Промоцијата се одржа во амфитеатарот на Институтот за македонски јазик „Крсте Мисирков“, а промотори беа акад. Марјан Марковиќ и проф. д-р Весна Мојсова-Чепишевска. Собирот го поздрави директорката на Институтот за македонска литература, проф. д-р Наташа Аврамовска, а свое обраќање имаше и главниот уредник на Зборникот, проф. д-р Маја Јакимовска-Тошиќ.

Изданието „Македонска книжевна архива: од ракопис до дигитална култура“ произлезе како резултат на дел од презентираните материјали на истоимената меѓународна научна конференција реализирана на 29-30 јуни 2021 година во просториите на Институтот за македонска литература и на Институтот за македонски јазик „Крсте Мисирков“ во Скопје, а по повод 40-годишниот јубилеј (1981-2021) од основањето и дејствувањето на Институтот за македонска литература при УКИМ.

Јубилејот се совпадна со одбележувањето на 100-годишнината од раѓањето на македонскиот национален мислител – Блаже Конески. На меѓународната конференција со свои излагања се вклучија 70-ина македонски и странски проследувачи на книжевните остварувања и дострели во македонската литература и култура создавана во континуирана последователност од 9. до 21. век.

Темите во изданието се систематизирани во четири посебни ориентациони пунктови: Книжевната архива на Блаже Конески, Ракописна и книжевно-историска архива / Фолклорна архива, Современа книжевна архива и Дигитална архива.

Во рефератите на изданието може да се проследи заемното согледување на ракописното наследство, на македонскиот фолклор и современата македонска литература во сите пројавени жанрови и низ дигиталните облици, што воедно допушта нивно проследување и во интермедијален и интеркултурен контекст.

(Текстот е објавен во „Културен печат“ број 160, во печатеното издание на весникот „Слободен печат“ на 24-25 декември 2022)