Промоцијата на збирката есеи, критички текстови и разговори од нашиот поет и книжевен деец Санде Стојчевски на 11 декември се одржа во Градската библиотека „Браќа Миладиновци“ во Скопје, а промотори беа Веле Смилевски и Иван Антоновски. Книгата е во издание на „Полица“.

Во збирката на едно место се сместени критичките осврти што Стојчевски ги има пишувано изминатите години, а кои се однесуваат на поетски дела на Чедо Јакимовски, Ристо Василевски, Ристо Лазаров, Славе Ѓорго Димоски, Славчо Ковилоски, Елена Пренџова, Стефан Марковски и Павлина Атанасова; прозата на Митко Маџунков, Билјана Станковска, Душан Стојковиќ и на научната студија на Иван Антоновски.

На критичките осврти им претходат два есеја за моќта на песната, а во третиот дел од книгата се сместени разговорите, односно интервјуата што низ годините со Стојчевски ги правеле многу новинари, пренесувани на многубројни медиуми.

Санде Стојчевски (Студена Бара, Кумановско, 1948) е поет, литературен критичар, есеист, антологичар, полемичар и преведувач. Автор е на 20 поетски збирки, како и на 18 книги со поетички текстови, есеи, критики и полемики. Објавени се и неколку избори од неговата поезија и есеистика во Македонија, потоа избрани дела во шест тома, како и десет поетски избори на странски јазици. Составил девет антологии на македонската поезија и критика.

Добитник е на сите позначајни домашни награди за поезија и за критика, како и на неколку меѓународни награди за поезија. Носител е на државната награда за книжевно дело „Св. Климент Охридски“, како и на наградата „Книжевен жезол“ на Друштвото на писателите на Македонија.

(Текстот е објавен во „Културен печат“ број 260, во печатеното издание на весникот „Слободен печат“ на 14-15.12.2024)