Педесет и три годишниот В.Ј од Скопје, од вторникот е позитивен на коронавирусот. Тоа е седмата дијагноза која што ја има овој човек, чии генералии се познати на редакцијата на Слободен печат, но поради тоа што тој стравува дека ќе го загуби работното место и дека нема да наиде на правда, решивме да му ја испочитуваме желбата и да ја раскажеме неговата голгота без неговите целосни лични податоци.

Покрај ковидот, В.Ј има и Паркинсонова болест, дијабетес тип два и уште пет дијагнози. Но, ова не претставувало аларм за здравствените институции од државното здравство. Откако влегол во системот на позитивни на ковид, го одбиле да му аплицираат инсулин и од Црвениот Крст и од Службата за итна помош и кај матичната лекарка.

Станува збор за лице на кое што животот му зависи од инсулин, меѓутоа откако станал позитивен на коронавирусот и влегол во официјалниот систем на државата за изолација буквално нема кој да му аплицира инсулинска терапија. Дополнително, човекот живее сам и стравува дека ако не прими инсулин во препорачаните и препишани дози секојдневно, тогаш во комбинација со коронавирусот може да падне во инсулинска кома.

Од вторникот официјално сум ставен во системот како пациент со ковид 19. Една од седумте дијагнози што ги имам е дијабетес тип два. Примам инсулин. Имам и Паркинсонова болест и тресење на рацете. Затоа не можам сам да го ставам инсулинот а ниту да мерам ниво на шеќер на крвта. Досега го примав инсулинот преку Црвен Крст. Ми праќаа негувателка за да ми става инсулин. Откако станав пациент со корона, од Црвен Крст ми ја повлекоа негувателката и ми откажаа. Ми рекоа да се обратам кај матичната лекарка. Таа ми рече дека бидејќи сум ковид пациент нема да може ни нејзината приватна здравствена установа да ми ја даде таа услуга, да ми стави инсулин. И мој роднина и јас лично се обративме до Брза Помош. И роднината и јас добивме дрски одговори, дека тоа не е нивен проблем и дека ќе ми исклучат зашто им ѕвонат на другите линии. Значи, Црвен Крст ми откажаа, матичниот лекар ми откажа, брза помош ми откажа. Сега го примам инсулинот знаете како? Како на времето, во Втора Светска Војна како што правеле илегалците, како некоја илегална работа. На милоста на еден доктор кој доаѓа да ми ја аплицира терапијата и не ми ни наплаќа. Десет дена ќе бидам затворен дома и не смеам да мрднам. Не смеам да одам никаде да ми дадат инсулин. Ако ме застане полиција и ме легитимира, ќе бидам прогласен дека намерно ја кршам изолацијата и го ширам вирусот. И кажете ми вие мене што да правам кога од официјални установи на државата сум одбиен, а сам не можам да го ставам инсулинот? А ако не ја примам таа терапија, и во комбинација со ковидот кој знае на кое ниво може да ми се качи шеќерот и да паднам во инсулинска кома. Живеам сам, нема никој да ме забележи. Значи државата ми го загрозува животот, ни рече В.Ј.

Тој додаде дека бидејќи инсулин треба да прими двапати дневно, една домашна посета од приватна установа е околу илјада денари, па за целосната изолација дури и кога би нашол лекар што би се нафатил да му го аплицира инсулинот, тоа би го чинело 20 илјади денари. А во меѓувреме, му се одбиваат пари за државното здравствено осигурување од платата.

Скандалот го обелодени доктор Бојан Трајковски од приватната здравствена установа Медика Вера. Тој самиот оди кај пациентот, без финансиски надомест воден од сопствената совест.

– Лице со телесен инвалидитет кое не може само да си ја аплицира терапијата, за која претходно има добиено регуларен специјалистички извештај, поради позитивираност е одбиено од итната медицинска помош и државната домашна посета за да му се даде терапијата! Ќе одиме, ќе ја даваме терапијата, ќе ја завршиме вашата работа со надеж дека некој некогаш ќе поднесе одговорност во државава, напиша доктор Трајковски на Фејсбук.

Итната медицинска помош во Скопје работи со 5 до 7 екипи.