Засадени 2000 садници покрај Партизанска за роденденот на „Паркови и зеленило“
Со садење на над 2000 садници, градоначалничката на Град Скопје, Данела Арсовска, заедно со вработените од Град Скопје и јавното претпријатие „Паркови и зеленило“, го одбележаа денот на градското јавно претпријатие кое континуирано работи на уредување на градското зеленило.
Акцијата за садење денеска се одвива на средишното и странично зеленило на булеварот Партизански одреди на потегот од мостот „Обединети Нации“ до Центар.
Од Град Скопје информираат и дека продолжува еко-акцијата преку бројни активности на садење дрвја и садници на повеќе локации низ Скопје, како и акциите планирани за пошумување на парк шумата Водно и парк шумата Гази Баба.
Зелените површини, зелените коридори и парковите играат голема улога во зачувувањето на здравјето на луѓето, а престојот во природа е клучен за одржување на физичкото и ментално здравје. Затоа од големо значење е да се достапни повеќе можности граѓаните да престојуваат во природа, а истовремено да се подигне свесноста за важноста од покажување посебна почит кон природата и одговорен однос кон неа без нејзино загадување и уништување, соопштуваат од Град Скопје.