Започнува нова ера: Славниот режисер Дени Вилнев ќе го режира новиот Џејмс Бонд
Славниот француско-канадски режисер Дени Вилнев, познат по визуелно импресивните филмски остварувања како „Дина“ (Dune) и „Блејд ранер 2049“ (Blade Runner 2049), ќе го режира следниот филм за Џејмс Бонд, потврдија од „Амазон Ем-џи-ем стјудиос“ во средата. Ова ќе биде првиот филм за тајниот агент во ерата на Амазон, откако годинава студиото презеде креативна контрола врз франшизата која децении наназад беше под водство на семејството Броколи.
Препорачано
Продуцентите Ејми Паскал и Дејвид Хејман, познати по блокбастери како Спајдермен и Хари Потер, претходно истакнаа дека пред изборот на нов актер за улогата на агентот 007, приоритет им е да имаат врвен сценарист и режисер. Сега, со Вилнев зад камерата, го добија токму тоа – еден од најценетите филмаџии на денешницата.
„Фан сум на Бонд откако знам за себе. За мене тоа е свет терен. Планирам да ѝ оддадам почит на традицијата, но и да отворам пат за нови мисии. Ова е огромна одговорност, но и голема чест и возбуда“, изјави 57-годишниот Вилнев.
Вилнев моментално работи на третиот дел од научнофантастичната сага „Дина“, кој треба да влезе во продукција ова лето. Ако снимањето на новиот Бонд почне во 2026, се очекува филмот да биде објавен во 2027 година.
Откако во 2022 година Амазон го купи „Ем-џи-ем стјудиос“ за 8,5 милијарди долари, филмската јавност со нетрпение очекуваше кога компанијата ќе направи крупен потег со највредниот бисер во нивното портфолио – Џејмс Бонд. Досега сите клучни одлуки ги носеше семејството Броколи, чувари на франшизата од самиот почеток.
Со Вилнев на чело, Амазон има цел не само да ги убеди скептичните фанови, туку и да докаже дека Бонд не ја изгубил својата суштина во новите раце.
„Џејмс Бонд сега е во рацете на еден од најголемите режисери на денешницата“, изјави Мајк Хопкинс, претседател на „Амазон Ем-џи-ем стјудиос“.
Вилнев беше избран пред имиња како Едвард Бергер, Пол Кинг, Едгар Рајт и Џонатан Нолан, брат на познатиот Кристофер Нолан.
Продуцентите Паскал и Хејман се воодушевени: „Дени ги сакаше филмовите за Бонд уште како дете. Отсекогаш му беше сон да режира еден од нив – а сега, тоа е и наш сон“.
