Запленети пет луксузни возила поради преголема бучава на неконтролиран собир на 120 автомобили во Струга
Од МВР информираат дека рано утринава, помеѓу 00:30 и 02:00 часот, полициски службеници на паркинг во Струга затекнале околу 500 млади луѓе кои со 120 спортски луксузни автомобили изведуваат неконтролирана „изложба“, со што предизвикале огромна бучава.
Препорачано
„Денеска (05.08.2025) во периодот од 00:30 до 02:00 часот, постапувајќи по претходна пријава дека на паркинг во Струга бил нарушен јавниот ред и мир од повеќе лица со бучава од возила, полициски службеници презеле повеќе мерки по Законот за безбедност на патниот сообраќај. Притоа, биле одземени пет возила по член 344 од Законот за безбедност на патниот сообраќај, а биле констатирани и осум други прекршоци од ЗБСП“, се вели во полициското соопштение.
Затекнатите луѓе добиле полициска наредба да го завршат настанот, но не ги послушале, со што биле повикани дополнителни служби кои успеале да ја стават ситуацијата под контрола.
Од полицијата додаваат дека по целосно расчистување и документирање на настанот, ќе бидат поднесени соодветни пријави.
