Од утре до четврток е забранета физичката активност на отворено, одлучи Владата на денешната онлајн седница, која беше свикана исклучиво заради потребата да се донесат мерки за заштита од високите температури, кои достигнуваат портокалово ниво на опасност.

– Владата поради топлото време донесе препораки за ослободување од работа на неколку категории граѓани и забрана за физичка активност на отворено. Од работни обврски се ослободуваат бремените жени и лица на возраст над 60 години во периодот од 12 до 18 јули. Во истиот период, работодавачите да ги реорганизираат работните активности на градежните работници и на работниците кои работат на отворено, со што ќе се избегне вршење на градежни и други физички активности на отворено во периодот од 11 часот до 17 часот. Се донесе одлука детските градинки да не практикуваат физичка активност и да не се изнесуваат децата на отворено од 11 часот до 17 часот – соопшти Владата.

Исто така, Владата препорачува до единиците на локалната самоуправа, Црвениот крст и центрите за социјални работи во регионите зафатени со топлотниот бран да пружат помош на осамените, старите, изнемоштените лица и на бездомниците.

– Со оглед дека одредени ризични производствени и технолошки процеси може да претставуваат дополнителен ризик за здравјето на изложените работници, се потсетуваат работодавците на обврската за почитување на законските прописи од оваа област. Владата на Република Северна Македонија постојано ја следи состојбата поврзана со високите временски температури и за таа цел навремено презема соодветни мерки за заштита на населението – соопшти извршната власт.

УХМР денеска прогласи портокалово ниво на опасност од високи температури до крајот на следната седмица.

– Продолжува периодот на сончево и многу топло време со дневна температура која насекаде ќе биде над 30 степени Целзиусови, а наместа ќе надминува 40 степени, поради што до крајот на следната работна седмица ќе биде активирано портокалово ниво за опасност од високи температури. Во недела во попладневните часови во западните делови ќе има локална појава на пороен дожд и грмежи – соопшти вчера УХМР.

Според Акцискиот план за превенирање на последиците од топлотните бранови врз здравјето на населението, усвоен од Министерствот за здравство во 2011 година, при портокаловото ниво на опасност треба да се постапува по специфичните планови за вонредни услови во секоја здравствена установа, во јавните институции и во пензионерските домови и образовните установи. Понатаму, мерките за порокалова опасност предвидуваат заштита на лицата кои се изложени на топлина на работните места, како и заштита на најранливите категории. На населението треба да му се даваат препораки за користење на јавните центри со климатизирани простории, а активистите на Црвениот крст треба да делат вода на граѓаните што се затекнати надвор за време на горештините. Предвидено е и Владата да разгледува дополнителни мерки за работното време и за ослободување на работните обврски на најранливите групи на населението.

Македонците најиздржливи при горештини – за Србите и Косовците црвен аларм на 38 степени, за нас дури на 44 степени!