Непосредно пред 37. издание на Саемот на книга, првиот роман на писателката Румена Бужаровска „Тони“, доби свое трето издание откако за само четири месеци беа распродадени повеќе од 2.000 примероци, соопштија од Издавачкиот центар „Три“.

Оттаму дополнуваат дека домашните читатели ќе имаат можност да се сретнат со Бужаровска и да добијат потпис на својот примерок на 9 мај, на штандот на „Три“ на Саемот на книга.

Романот го освојува и Балканот. Српското издание на романот ќе излезе на 3 јуни во издавачката куќа „Бука“, а на истиот датум ќе излезе и во Хрватска, во издание на „Фрактура“.

Романот е откупен и од престижната француска издавачка куќа „Галимар“, која досега ги издаде и збирките раскази на Бужаровска „Мојот маж“ и „Не одам никаде“. Правата за „Тони“ се откупени и во Шпанија, Грција, Косово и во Црна Гора, што значи дека романот наскоро ќе може да се чита на седум европски јазици.

По гостувањето на домашниот Саем, ќе продолжи балканската книжевна турнеја на Бужаровска и на 11 мај ќе гостува на солунскиот саем на книга по повод скорешното грчко издание на збирката раскази „Осмица“ во издание на „Гутенберг“, а во превод од македонски јазик на Александра Јоаниду.

Бужаровска ќе ја посети и Албанија, по повод промоцијата на албанското издание на „Мојот маж“ во превод на Крешник Ајдини, а издаден од издавачката куќа „Кандработиме“.

На 4 јуни Бужаровска ќе гостува и во Србија, на книжевниот настан на клубот „Букса“ посветен на неодамнешното српско издание на „Господ, па Америка“ во издание на „Бука“, која веќе неколку недели е најпродавана книга во нивните книжарници.

(Текстот е објавен во „Културен печат“ број 279, во печатеното издание на весникот „Слободен печат“ на 3-4.5.2025)