Откако градоначалничката Данела Арсовска деновиве изјави дека Универзална сала се реконструира со многу пропусти и недоследности и според небезбеден проект, таа ја покани министерката за култура Бисера Костадиновска Стојчевска на средба на која ќе ѝ се презентираат недостатоците на проектот и ја повика да гарантира за безбедноста на салата. Средбата денеска не се случи, по што од Град Скопје заклучија дека со тоа министерката докажува дека таа ги потврдува наводите од сите записници и техничка документација.

Ниту градоначалниците ниту министрите не се тие кои треба да гарантираат материја вон нивните овластувања и експертност. Само стручњак со ист или повисок степен на квалификација може да суди дали некој проект е точен или неточен. Извинете, но плукајќи се меѓусебе цело време ги опоганувате оние кои вистински работат – реагираше денеска во врска со актуелните случувања Асоцијацијата на архитекти на Македонија.

Во своето соопштение тие посочуваат дека деновиве сме сведоци за невиден и опасен преседан, за архитектурата и за проектантите, да се зборува од позиција на аматеризам, со вметнување на опасни тези дека наводно Универзална сала се гради според небезбеден проект. Од Асоцијацијата сметаат дека е крајно време да се престане со омаловажување на струката и нејзино користење во дневно-политички пресметки помеѓу политичките опоненти.

За квалитетите на проектните решенија стандардизирани со закон можат да се произнесат самите учесници според нивната хиерархиска структура: проектант, одговорен проектант, ревидент, супер-ревидент. Тоа е накусо методологијата на проектниот процес и негова законска верификација пред отпочнување на изведбените работи. Оттука, секој градбен процес е резултат на точно законски одредена процедура со што се гарантира физичката, економско-правната, социо-културната и секоја друга безбедност на проектантот, изведувачот, корисникот, инвеститорот и на крај општеството – нагласуваат од Асоцијацијата.

Доколку стручно и овластено лице и само такво лице, увиди неточности во проектот од својата област, должен е да побара супер ревизија на целиот проект како не би дошло до било какво загрозување на безбедност на граѓаните. Тогаш, како што велат архитектите, проектот треба да биде сопрен, а сите инволвирани да бидат исправени пред лицето на правдата, и проектанти и ревизори и изведувачи и нарачатели, а компаниите кои тоа го верификувале да им бидат одземени сите лиценци и дозволи за работа.

Според нив, проектот Универзална сала е уникатен за нашата градежна оператива, зашто се реконструира без да се сруши претходно постоечкиот објект.

Објект стар над 50 години доживува голем број на деформации за време на својата експлоатација кои се видливи само со инструмент или се артикулрираат при изведба на нови елементи, а при тоа треба да се додаде дека постојниот објект е од полумонтажен тип. Така што замена на одредени решенија во текот на градба на вакви објекти е сосема нормално, се додека замената не ги надмине во голема мера проектираните решенија. Но, таквата состојба треба стручно и да се препознае и да се утврди по законски пат, а не преку медиуми – се вели во соопштението на Асоцијацијата на архитекти.

Оттаму потсетуваат дека во целиот процес на проектирање и контрола се вмешани и Градежниот факултет и Институтот за земјотресно инженерство и инженерска сеизмологија и  се додека тие не се повлечат од проектот, тој е легитимен.