Филмот „Barbie“ заработи повеќе од милијарда долари ширум светот – и за осум месеци од сега, уште милион барбики би можеле да му кажат „здраво“ на светот, сугерираат информациите од една популарна веб-страница за именување бебиња.

Според „Нејмбери“ (Nameberry), пребарувањата за „Барби“ се зголемиле за 603 отсто од април, кога беше објавен трејлерот за летниот блокбастер во режија на Грета Гервиг, пренесува „Њујорк пост“(Nypost).

Пребарувањата за „Кен“ – или „Кенет“ – забележаа зголемување од 293 отсто во истиот временски период.

„Барби и Кен го будат интересот на родителите, но тоа не значи дека тоа ќе се претвори во вистинска употреба“, изјавила за „Пипл“ (People) главната уредничка на „Нејмбери“, Софи Ким.

И додека зголемувањето на интересот е импресивен, Ким изјавила дека двете имиња не се очекува да се пробијат во првите 10 наскоро.

„Барби и Кен се веќе постоечки имиња кои сè уште не се вратиле, па иако може да има благ удар од филмот, ниту едно нема да биде меѓу најпопуларните имиња за бебиња во 2023 година“, објасни таа.

Во моментов, „Барби“ рангира 1.896 од 2.000 најпопуларни имиња за 2023 година на веб-страницата.

„Кенет“ ужива поголема популарност, со 113 од 2.000.

Во објавата на социјалните мрежи , Ким истакна дека „Барби“ дебитирала во топ 1000 во 1961 година, две години по објавувањето на куклата „Мател“.

Сепак, до 1969 година името повторно падна од топ листите.
Ким истакна дека „Барбара“ – за која „Барби“ може да послужи како прекар – испадна од мода во 60-тите, кога почна да се гледа како старомодна.

„Во 2022 година името Барби беше икористено за само 27 девојчиња“, истакна таа.