„Watch Out“ со порака: Фестивалите преку културните политика треба да се залагаат и за општествени промени
Филмскиот фестивал „Watch Out“ кој започна синоќа со прикажување на неколку филма во Музејот на комунистичката партија во Тетово, денеска продолжи со работилница, во која младите учеа што е тоа Стори борд и како тој се применува во долгиот процес на изработка на филмот.
Препорачано
Уметникот Ѓорѓе Јовановиќ, вели дека помина времето на класични фестивали, во кои само се прикажуваа филмови. Сегашните фестивали имаат за цел да пратат значајни пораки за промени во повеќе сегменти од општественото живеење, но на нив и младите да научат нешто повеќе за одредена уметност, преку организирање на работилници како денешнава.
„Во секој случај сега се повеќе филмските фестивали не се само класични, туку преку своите културни политики сакаат да пренесат разни пораки. Имате големи фестивали кои низ самата програма ги пренесуваат пораките, а од друга страна имате фестивали кои во самата своја структура го имаат сето тоа и на самите фестивали се залагаат за одредени идеи. Имаме во регинот многу успешни вакви фестивали како оној во Загреб под името „Фестивал за човекови права“ и во Сараево има сличен фестивал. Во вакви турбулентни региони вакви уметнички манифестации се потребни, бидејќи уметноста е одличен медиуми преку кој може да се пратат важни општествени пораки“, вели Ѓорѓе Јовановиќ.
Фестивалот „Watch Out“, преку дел од филмовите кои ќе се прикажат, меѓу другото ќе упати порака за зачувување на јавните простори кои во урбаните средини се помалку ги има, особено во Тетово каде секоја слободна површина се пренаменува претежно за градежна парцела.
Фестивалот е во организација на невладината „Лоја“. Оттаму велат дека овој фестивал има за цел да ја пополни празнината која постои во Тетово од областа на културата.
На годинешниот фестивал биле пријавени над 850 филма од 85 земји, а селектирани се над шеесет филма кои ќе бидат со превод на англиски јазик. Невладината „Лоја“ за заложбите во изминативе 23 години во повеќе полиња пред се во областа на културата од Претседателот на државата прими награда за развој на граѓанското општество.
