Англиските фудбалски премиерлигаши во јуни ќе гласаат за можно укинување на ВАР технологијата од следната сезона, по предлогот поднесен од Вулверхемптон.

Како што пренесуваат британските медиуми, 20 клубови на годишното собрание на 6 јуни ќе гласаат за евентуалното укинување на ВАР. Барањето до Премиер лигата е официјално поднесено од Вулверхемптон.

Вулверхемптон рече дека ВАР е воведен со добра волја, но довел до „голем број несакани негативни последици кои го оштетуваат односот меѓу навивачите и фудбалот“.

ВАР технологијата беше воведена во 2019 година за да им помогне на судиите да донесат важни одлуки на теренот, но оваа сезона имаше голем број контроверзни инциденти, објави „Би-Би-Си“.

– Цената што ја плаќаме за мало зголемување на прецизноста е во спротивност со духот на нашата игра – се вели во соопштението на Вулверхемптон.

Премиер лигата соопшти дека ја признава загриженоста за ВАР, но целосно ја поддржува технологијата и дека ќе продолжи да работи со судиската организација на подобрувања.