Во првите неколку дена од новата година, милиони луѓе ширум светот повторно беа вовлечени во насилната приказна на серијата „Squid Game“. Нетфликс објави дека втората сезона на хит серијата е убедливо најуспешната продукција.

Нетфликс објави за 58,2 милиони прегледи во периодот од 30 декември до 5 јануари, а кога ќе се додаде тоа на претходниот број прегледи, втората сезона од серијата е веќе прегледана 126,2 милиони пати и тоа за само 11 дена.

Бруталната јужнокорејска драма за навидум безопасни, но на крајот смртоносни детски игри е најуспешната серија на Нетфликс.

Првата сезона собра пофалби пред три години поради критиката на општеството, прашањата за социјалната нееднаквост, дискриминацијата и моќта на елитата.

Деветте епизоди од првата сезона беа прегледани вкупно 265 милиони пати во првите 90 дена – повеќе од која било друга серија на Нетфликс досега.

По втората сезона, веќе оваа година се планира трета и последна сезона од серијата.