Носителите на лиценци за вршење енергетски дејности, вклучувајќи ги и носителите на лиценци за пробна работа, имаат рок од еден месец да поднесат барање за промена на лиценца до Регулаторната комисија за енергетика (РКЕ), согласно новиот Закон за енергетика. Во спротивно, лиценцата ќе престане да им важи.

Како што соопшти претседателот на РКЕ, на денешната прес-конференција рокот почнува да важи од 29 мај се до 30 јуни.

– Барањето за промена ќе се смета за уредно доколку биде доставено до архивата на РКЕ или пратено до официјалната електронска пошта [email protected] или пратено по пошта, во наведениот рок, при што ќе мора подносителот да достави доказ за приемен датум од пошта на официјалната електронска пошта – појасни Бислимовски.

Барањето е достапно на веб-страницата на РКЕ, а за секоја лиценца се поднесува поединечно Барање за промена.

– Не може со еден образец да се поднесе барање за промена на повеќе од една лиценца – додаде претседателот на РКЕ.

Лиценците за пробна работа согласно новиот Законот за енергетика, ќе може да се продолжат исклучиво за тестирање на техничките перформанси на енергетскиот објект и влијанието врз енергетскиот систем на којшто е приклучен, други основи не се предвидени.

– Новите одредби од законот не предвидуваат привремена лиценца – додаде Бислимовски.