Невремето што попладнево го зафати Охрид не дозволи 38. издание на традиционалниот Охридски пливачки маратон да се заврши до крај. По 4,5 часа пливање, во 14:30 часот трката беше прекината од безбедносни причини.

Во машка конкуренција, во моментот на прекинот израмнети на првото место беа Италијанците Матео Фурлан и Федерико Тамборино, заедно со Аргентинецот Матијас Диас Хернандес, па согласно правилата тројцата се прогласени за победници. Зад нив следуваа Марко Инглима од Италија, Петар Цеков од Македонија, Хуго Риберо од Португалија, Александар Илиевски од Македонија, Аргентинецот Акилјес Балудо и Леонид Мишевски од Македонија.

Кај жените, најбрза беше Аргентинката Мајте Ајлен Пука, која го освои златото. Второто место ѝ припадна на нејзината сонародничка Ерика Јенсен, додека третопласирана беше Србинката Милица Љубисављевиќ. Нашата Росана Гошева заврши четврта, пред Италијанката Елена Лоенело и Алисја Гедриш од Полска.