Македонскиот репрезентативен голман, Столе Димитриевски, е во трка со времето за да си обезбеди нов клуб, откако стана јасно дека Валенсија нема да смета на него за новата сезона. Преодниот рок завршува на крајот од месецов, а засега тој и понааму е член на клубот од „Местаља“ каде што е далеку од тоа да биде прв избор на голот.

Во претходниот период, Димитриевски беше најмногу поврзуван со градскиот ривал Леванте. Се шпекулираше дека македонскиот голман веќе ги договорил личните услови со клубот, но зделката пропадна поради тоа што двата тима не успеаа да се договорат околу финансиските детали. Имено, Валенсија не била задоволна од понудените услови за позајмица бидејќи Леванте побарал тие да покриваат дел од платата на македонскиот голман и тоа за градскиот ривал не било прифатливо.

Во меѓувреме, како потенцијална опција отпадна и Елче, кој исто така беше споменуван како можен нов клуб за Димитриевски, но тие веќе пронајдоа нов чувар на мрежата.

Во моментов, единствена реална дестинација останува Селта Виго, клуб кој и претходно покажа интерес за Димитриевски. Сепак, не е познато дали и таму ќе дојде до договор со Валенсија, која и натаму стои цврсто на своите финансиски барања.