Директорот на Здравствен дом Струга доктор Андон Ложанковски за „Слободен печат“, вели дека уште не ја видел видео снимката на која негови вработени пиеле кафе на бензинска пумпа додека пациентот на кислородна маска чекал во санитетското амбулантно возило, како што тоа денеска беше презентирано од страна на новинарка пред очите на министерот за здравство Фатмир Меџити.

-Началникот на службата ми кажа дека видел такво видео, јас чекам да ми го пратат и веднаш да утврдам кои вработени биле на снимката. Недвосмислено ќе има санкции, не знам дали парични од плата или откази, ама санкции ќе има откако ќе ја свикаме комисијата за санкции и ќе ја контактирам правната служба и министерството за здравство, изјави Ложанковски за „Слободен печат“.

Денеска на прес-конференција новинарка на министерот за здравство Фатмир Меџити од својот мобилен телефон му покажа снимка на која се гледало како возило на струшката брза помош застанува на бензинска пумпа за лекарите и медицинскиот персонал да испие кафе, додека пациентот на кислородна маска чека во возилото.

Меџити најави санкции и дека веднаш ќе го испита случајот.