Во герила-акција на граѓански активисти од Струга, доцна вечерва зградата на општината беше осветлена со пораки за чист воздух и вода, јавува „СДК.мк“.

На зградата на општината беа проектирани паролите „Нема воздух, нема вода, нема живот“, „Воздух или смрт“, „Сите се труеме“, „Струга се суши“, „Чист воздух е право, а не привилегија“.

Активистите велат дека е опасно да се живее во град кој со години се труе од дивата депонија која се наоѓа на само 500 метри од првите куќи, во близина на реката Црн Дрим и на два километри од Охридското Езеро.

Откако македонските судови ја отфрлија тужбата поднесена од Здружението на млади правници, сега Судот за човекови права во Стразбур ќе одлучува за горливиот струшки здравствен и еколошки проблем.

Денеска Струга остана и без вода од 13 часот, а дел од околните населби и села немаа вода од 17 часот. Стружани скоро секоја година во текот на летото се соочуваат со проблем во водоснабдувањето, но ова е првпат да нема вода во септември.

Судот во Стразбур ќе одлучува за депонијата која ја труе Струга