Инспекторите по туризам вршат засилени вонредни инспекциски контроли на брегот на Охридското Езеро. Се чешлаат хотелите, станоиздавачите, вилите, камповите и туристичките водичи. Сите се должни да ги пријавуваат гостите и да плаќаат туристичка такса која изнесува 40 денари на ден по турист, но и данок на остварените приходи, објави МРТ.

Сопствениците на станови не смеат да сместуваат гости без да се регистрирани за таа дејност, а за изнајмениот стан на роднини и пријатели треба да платат, ослободени се само гостите до прво колено.

– Како мерка што ја користиме по законот за инспекциски надзор, е опомена. Меѓутоа, некаде каде што сме имаме доказ, или сознание, или сме увиделе при вршење на надзорот дека не е тоа веќе за опомена, тогаш се изрекува глоба. Глобата е од 100 до 250 евра за физичко лице – објаснува Виолета Тунтева, инспекторка по туризам.

Секојдневни контроли се вршат и на странските групи туристи што се должни да ангажираат локален туристички водич. Затекнати се странски водичи што сами го презентираат Охрид, но и со фалсификувани легитимации.

– Охрид има регистар на туристички водичи со завидна бројка. Може да се случи, да сум искрена, да се провлече некоја група, да не именувам од која држава, може да се случи, дури, за жал, се затекнуваат некои со импровизирани легитимации при што, ако се затекнат на лице место, веднаш се изрекува глоба – вели Тунтева.

Сивата економија во туристичкиот сектор е намалена, но сè уште присутна. Дел од станоиздавачите нецелосно ги пријавуваат туристите, затајуваат данок, но има и такви, кои не се категоризирани и на диво сместуваат туристи без да плаќаат никакви давачки, велат надлежните.